circle on cavill hotel - goldcoast

فندق سيركل أون كافيل - غولد كوست - أستراليا

circle on cavill hotel - goldcoast

اليوم تقريري عند فندق سيركل أون كافيل في غولد كوست ..

كانت مدة سكني في الفندق 9 أيام ..

الغرفة كانت مطلة على البحر ..

1- الحجز ..

حجز الفندق كان قبل 4 شهور من الرحلة .. وتم الحجز عن طريق موقع بوكينغ ..

صفحة الفندق في بوكينغ ..

mantra circle on cavil

2- الوصول إلى الفندق من المطار ..

طبعا من المطار خذنا تاكسي إلى الفندق .. وفي ناس يروحون في الشاتيل باص .. لكن خفنا إن ما نعرف نركب الباص المطلوب خصوصا إنه مكان أو مرة نزوره ..

السعر بالعداد تقريبا طلع 75 دولار استرالي ما يقارب 16 د.ك

3-  مكان الفندق ..

الفندق موقعه جدا جدا ممتاز .. تقريبا في قلب الـ surfers paradise .. وهو يعتبر سنتر المدينة ..

من 3-4 دقايق مشي توصل الشاطئ

تحت الفندق على طول جمعية وصيدلية ومطاعم وكافيهات وامتداد الشارع سوق ومحلات إلى أن توصل البحر .. :)

4- خدمات الفندق ..

- الحلو في الفندق إن فيه كل الأشياء اللي تحتاجها .. يعني يعتبر شقة كاملة لكن بنظام الخدمات الفندقية ..

- موفر المطبخ والمواعين واللي راح تحتاجها سواء للطبخ أو الأكل وفيه فرن ومايكرويف وشواية .. ومكنسة وغسالة ونشافة

.. وإذا تبي الفندق ينظف تتصل عليهم ..

- أيضا نقطة حلوة إن الفندق نفسه ما عنده مطعم لكن موفر أرقام المطاعم اللي توصل الفندق في الدفتر اللي تكون فيه معلومات الفندق والمطاعم كثييييييرة جدا يعني لازم في شي راح يعجبكم :)
- أيضا في نادي رياضي وحمام سباحة ودور فيه صالة ألعاب للأطفال ..

5- ملاحظات على الفندق ..

الحمام اهو كان المشكلة هههههههه :/

الحمام وأنتو بكرامة مطل على غرفة النوم .. وكان في شتر يتسكر لكن للأسف كان خربان .. ومادري إذا كل غرف الفندق بهذا النظام أو فقط الغرف المطلة على البحر !!

والشغلة الثانية لازم تنتبهون لها .. اهي ريموت التلفزيون .. عن طريقه تقدر تشتري أفلام عشان تشوفها .. فإذا طاح بيد ياهل راح يشتري الأفلام من غير لا تدرون وتنصدمون بالفاتورة >> هذا اللي حصل معانا بالضبط :/

.. أترككم مع الصور وأي استفسار ما عليكم إلا إنكم تتركونه في الكومنت :)

 الصالة .. 

 غرفة النوم .. 

البلكونة ..

المطبخ .. 

إطلالة الغرفة والصالة ..

الحمام .. 

ودمتم بخير .. 

:)