Move World - Goldcoast - Australia

Move World

موفي وورلد

غولد كوست .. شهيرة بـ theme parks وحديقة الـ move world  من أجمل الحدايق اللي تنزار في هذي المنطقة السياحية ..

الحديقة جميلة جداً وتصلح لكل الأعمار .. :)

طريقة الوصول ..

مثل ما بينت من قبل إن في أستراليا ما يستعملون التاكسي كلش .. فخفنا إن ناخذ تاكسي من الفندق وبالحديقة نتوهق وماكو أحد يردنا .. فقررنا نكلم ريسبشن الفندق عشان ينظم لنا الرحلة .. وهذا اللي حصل ..

اتفقنا معاه ان نبي نروح مبجر .. قالنا 8 تكونون موجودين باللوبي ..

وفعلا قعدنا ووصل باص كبير وقبل لا نركب عطانا ورقة فيها أوقات الرجوع ولازم نختار وقت .. والأوقات اللي موجودة جدا مناسبة واهما حاطينها بناءً على غالبية الناس متى تروح وترجع .. الباص جدا فكرة حلوة لكن مشكلته إن يمر جم مكان ويلقط الناس من الفنادق .. يعني تأخذ قريب النص ساعة إلى ساعة إلا ربع عشان تبدا بالطريج وبعدين يوزعون الناس من الأقرب للأبعد .. لكن الحدايق هذي أصلا مو بعيدة .. أبعد وحدة فيهم كانت ربع ساعة .. لكن بوجه عام أهو أحسن وسيلة تنقل في غولد كوست للحدايق .. بالنسبة للسعر والتوفر :)

تذاكر الحديقة ..

طبعا ومثل ما تعودتوا أفضل طريقة لحجز التذاكر اهي الويب سايت مال الحديقة .. بعيد عن زحمة الشباك :)

بالنسبة للعروض احنا خذينا عرض تذكرة مفتوحة لمدة 7 أيام وتختار 3 حدايق فقط  .. احنا اخترنا ..

move world

sea world

paradise country

أسعار التذاكر ..

العرض هذا سعر التذكرة للشخص البالغ 84 دولار استرالي . . ما يقارب 18 د.ك

أما بالنسبة لأسعار الـ move world  بروحها ..

تذكرة الشخص البالغ لمدة يوم واحد 79 دولار أسترالي ما يقارب 17 د.ك

الأطفال من عمر ( 3-13 ) سنة 64 دولار أسترالي ما يقارب  13 د.ك

طبعا قع تشوفون فرق السعر شلون كبير يعني كأنك تأخذ سعر حديقة وحدة حق 3 حدايق .. العروض وايد حلوة وتوفر واايد من خلالها .. :)

رابط تذاكر الحديقة .. 
move world

رابط تذاكر العروض ( أكثر من حديقة ) 
theme parks

الحديقة وأقسامها .. :)

الحديقة عموماً مو وايد كبيرة .. حجمها عادي وتعتبر صغيرة نوعا ما ..

thrill rides

هذا فيه القطارات والألعاب الكبيرة اللي تصلح حق فئة الشباب فما فوق

kids fun

أو الن زون .. فيها ألعاب حق الأطفال من عمر سنتين وفيها أيضا الـ drive school حق الأطفال من عمر تقريبا 3

family intertainment

هذا القسم فيه الـ main street وفيه العرض الرئيسي للحديقة اللي تظهر فيه شخصيات bugs bunny  وغيره من شخصيات وورنر بروس مثل بات مان والنينجا وسوبر مان والجوكر وغيرهم .. وفيه أيضا الـ driver rides وتقام فيه عروض السيارات اللي تعتبر من أقوى العروض في هي الحديقة ..

خدمات الحديقة ..

¬> أحلى شي عجبني فيها إن ما تتأذى أوقات الصلاة ولا تطوفك .. المصلى فيها جميل ونظييف جدا وواضحة الإشارات حقه داخل الحديقة وفي الخريطة مالت الحديقة اللي تستلمها من عند الباب ..

¬> دورات المياه نظيفة جدا ومتوفره كل مكان .. وفيها أماكن لتبديل الأطفال ..

¬> غرف الرضاعة والتبديل ..

أيضا متوفره في الحديقة ومرتبة وفيها غنفات للأمهات اللي يبي يرضعون وفيها أيضا مايكرويف للي يبي يسخن حليب أو أكل أو ماي للأطفال ..

¬>  الأكل ..

بالنسبة للخفايف والأيس كريم متوفر بشكل كبير فيها محل جينز أند جيريزالعجييب :) .. لكن كأكل غدا فيها بس ما شفت فيها مطعم مكتوب عليه حلال أو يبيع أشياء بحرية .. لكن عموما نقدر نقول إن كل شي متوفر بالحديقة :)

¬> بالنسبة للستورات ..

وايد وايد وايد أسعارها مناسبة بالنسبة " للتسورات اللي بالثيم باركس " مثل يونيفرسال وديزني وغيرهم فعلا أسعارهم كانت عجيبة :)

وأترككم مع الصور للرحلة :)

العرض الرئيسي للحديقة .. 

أقوى برد :( عجيييييييب 

عالم الأطفال ..

أجمل شي بالحديقة إن شخصياتها تطلع من كل مكان وتتمشى بصمت .. اللي يكتشف يكتشف :) 

يعني حق الناس اللي يحبون الشخصيات وما يحبون الزحمة والمداحر تمام :) 

احلى شي إن ستوراتهم متنوعة ومو مكررة وأسعارها وااايد مناسبة :)


دمتم بخير :)