SINGAPORE ZOO

SINGAPORE ZOO 

حديقة الحيوان - سنغافورة 

بالبداية راح أكتب لكم رايي بالحديقة وبعدها إن شاء الله راح أبين أسعار التذاكر وطرق الوصول والصور للحديقة .. 

الحديقة من أجمل حدايق الحيوان اللي زرتها ( إن لم تكن الأجمل ) .. 

زرتها في سنة 2012 قبل هالسنة وفعلا حبيتها ورديت زرتها هالسنة 2015 .. وحبيتها واستانست فيها وايد .. 

حديقة مرررتبة من كل الواحي .. 

إطعام الحيوانات ( feeding )  

ترتيب الحيوانات نفسهم .. ( ما تضيع وتلف الحديقة لأنك طفت حيوان لأنك ماراح تطوف شي ) 

العروض ( جدا جميلة وأوقاتهم مناسبة  ) 

دورات المياه - الكافيهات - المطاعم 

سوق الحديقة ( store ) 

وايد من حدايق الحيوان اللي زرتها سواء في أوربا أو غيرها تكون كبيييرة لكن أغلبها فاضية وتتعب على ما تلقى الحيوانات لكن في هذه الحديقة كلللش ما تحس بالوقت ولا بالتعب وفعلا اهي كبييرة لكن في كل مكان حيوان 

طبعا تعتبر حديقة سنغافورة من أجمل حدايق الحيوان في العالم وترتيبها مو بعيد عن الـ10 الأوائل .. :) 

التذاكر .. 

أسعار التذاكر .. 

الشخص البالغ 32 دولار سنغافوري ما يقارب 6.5 د.ك

الطفل ( 3-12 سنة ) 21 دولار سنغافوري ما يقارب 4 د.ك 

الأطفال تحت 3 سنوات دخولهم مجاني 

طبعا حجز التذاكر ممكن يكون عن طريق الموقع الإلكتروني للحديقة أو عن طريق شباك التذاكر 

( لكن أنصح بالحجز من الموقع لتجنب لزحمة في الحديقة .. وأيضا الموقع يوفر عروض جيدة لمن يريد شراء التذاكر لأكثر من حديقة ( حديقة الطيور والريفير سفاري والنايت سفاري ) .. سيتم كتابة التقارير عنهم قريبا ) 

موقع الحديقة .. 
http://www.zoo.com.sg/
التذاكر

الوصول .. 

الحلو في هذه الديرة إنها مو كبيرة وكل مشاويرها بالتاكسي والتاكسي متوفر في كل مكان وأسعاره معقولة جدا .. وكل التكاسي حسابها عن طريق العداد ( meter ) 

طبعا الدخول مثل ما قلت لكم الأفضل انك تكون حاجز تذاكرك من النت لتجنب الزحمة عند شباك التذاكر .. 

وهذي صور من الـ feeding :) 

وهذي من عرض الفيلة في عام 2012 هالسنة كان مسكر يوم رحنا أتوقع عشان المطر :) عرض جدا جميل !

عالم الأطفال في حديقة الحيوان .. 
فيه لعبة السيرك اللي تدور وفيه ركوب الحصان وركوب البوني وعالم الماي عشان اليهال ما يحسون بالحر :)

هذا الحر وما يسوي :/

منطقة انتظار التاكسي .. 

طبعا المكان جدا منظم ومحد ياخذ دور أحد .. اللي متصل على تاكسي يكون قاعد ع المقاعد واللي ينتظر أي تاكسي يكون في الطابور والطابور سريع لأن التاكسي ما تنقطع عن المكان أبدا يعني أقصى انتظار 20 إلى 30 دقيقة مو أكثر :) 

.. 

الحديقة وايد حلوة وتستاهل الزيارة :)